Փետրվարի 13-ին ամփոփվել են գարնանը Դրեյփերի համալսարանում ուսանելու կրթաթոշակի համար հայտարարված մրցույթի արդյունքները: Ներկայացված 109 հայտից հաղթող է ճանաչվել 5 ձեռներեց՝ իրենց նախագծերով (Կարեն Շահնազարյան՝ Forge Fiction, Սվետլանա Ջաղացպանյան՝ ForestGuard, Կարեն Նիկողոսյան՝ Swap, Լուսինե Մագաուզյան՝ oores, Հակոբ Թումանյան՝ Yolo): Նրանց տրամադրվել են ՀՀ բարձր տեխնոլոգիական արդյունաբերության նախարարության կողմից 100 տոկոսով փոխհատուցվող կրթաթոշակներ:
Եվս 3 գաղափարի հեղինակների հաճելի անակնկալ էր մատուցել Դրեյփերի համալսարանը՝ հաշվի առնելով մասնակիցների նորարարական մտածողությունն ու գաղափարների զարգացման ներուժը: Կարեն Խաչիկյանը՝ Robin, Ռուբեն Համբարձումյանը՝ Cerebrus, Հայկ Բադալյանը՝ Garoon ծրագրերվ ևս, ստացան կրթաթոշակներ՝ 50 տոկոսի չափով:
Այսօր ԲՏԱ նախարարությունը ուրախությամբ տեղեկացնում է, որ «Իմ քայլը» հիմնադրամը պատրաստակամություն է հայտնել փոխհատուցելու վերջիններիս կրթաթոշակի մնացյալ 50 տոկոսը, ինչի արդյունքում 8 ձեռներեցներն էլ կստանան ուսման և ճանապարհածախսի 100 տոկոս փոխհատուցում:
ԲՏԱ նախարար Հակոբ Արշակյանը շնորհավորել է բոլոր հաղթողներին և հիշեցրել, որ Դրեյփերի համալսարանում սովորելու համար 2020 թ․ ևս 2 անգամ մրցույթ կհայտարարվի:
