Կառավարությունը հավանություն տվեց «Կույրերի, տեսողությունից հաշմանդամություն ունեցող կամ ընթերցողության ֆունկցիայի այլ դժվարություններ ունեցող անձանց համար հրատարակված ստեղծագործությունների մատչելիությունը դյուրացնելու մասին» Մարաքեշի պայմանագիրը վավերացնելու մասին» օրենքի նախագծին:
Հարցով զեկուցող, էկոնոմիկայի նախարարի տեղակալ Ավագ Ավանեսյանը հայտնեց, որ այժմ Հայաստանում միջազգային գրականության միայն 2 տոկոսն է հասանելի կույրերի, տեսողության կամ ընթերցանության որոշակի խնդիրներ ունեցող մարդկանց համար:
«Պայմանագրով սահմանվելու է, թե ինչ է աշխատանքը, այսինքն՝ այդ մտավոր սեփականության օբյեկտը ո՛րն է, ի՛նչ է նշանակում ձևաչափը համապատասխանեցնել, որո՛նք են այն իրավասու մարմինները և ի՛նչ նպատակով այդ աշխատանքների ձևաչափը փոփոխել: Եթե որևէ ՀԿ փորձի մտավոր սեփականության իրավունքով պաշտպանված գործ թարգմանել բրայլյան շրիֆտով, ապա Մարաքեշի համաձայնագիրը թույլ կտա առանց հեղինակի թույլտվության համապատասխան գործողությունն իրականացնել: Համաձայնագրի դրույթները նաև գրադարանների վրա են տարածվում»,- նշեց էկոնոմիկայի նախարարի տեղակալ Ավագ Ավանեսյանը:
