Կառավարությունը հավանություն տվեց Հայաստանի Հանրապետության տարածքային կառավարման և ենթակառուցվածքների նախարարության և Եվրոպական ներդրումային բանկի միջև ««Արևելյան գործընկերություն. կապակցվածության ոլորտում ներդրումներ» նախաձեռնության շրջանակներում տրամադրվող խորհրդատվական աջակցության և խորհրդատվական ծառայությունների մասին» թիվ AA-013536 համագործակցության համաձայնագրի ստորագրման առաջարկությանը։
ՏԿԵ նախարար Դավիթ Խուդաթյանն ասաց. «Խոսքը վերաբերում է «Խաղաղության խաչմերուկ» նախաձեռնության շրջանակներում Գյումրիից Ախուրիկ 25 կմ երկարությամբ և Արմավիրի մարզի Վարդանաշեն գյուղից դեպի Մարգարա՝ Մարգարայի անցակետ, 5 կմ երկարությամբ ճանապարհների տեխնիկատնտեսական ուսումնասիրությանը, նախագծմանը, սոցիալական և բնապահպանական գնահատման նախագծի ընդունմանը։ Պիտի ասեմ, որ այստեղ նախատեսում ենք շինարարական աշխատանքները շարունակել զուգահեռաբար կառուցելու և նախագծելու տրամաբանությամբ։ Այս նախագծով առաջարկվող աջակցությունը նախատեսում է այս ամբողջի մասով մրցութային փաստաթղթերի պատրաստում։ Ընդհանուր առմամբ խոսքը 30 կմ ճանապարհահատվածի մասին է»։
Վարչապետ Նիկոլ Փաշինյանը նշեց. «Ճանապարհների երկու փոքր հատվածների մասին է խոսքը, որը, մեծ հաշվով, վերաբերում է Հայաստանի և Թուրքիայի միջև սահմանի բացման նախապատրաստական աշխատանքներին, բայց շատ կարևոր եմ համարում ընդգծել, որ սա շատ ավելի մեծ տեսլականի մաս է, և առիթ ունեցել եմ սրա մասին խոսելու։ Սա այն դեպքերից է, երբ մենք, գոնե ես ինքս ինձ համար, արձանագրում ենք, որ մենք իրականում այդքան էլ լավ պատկերացում չունենք մեր երկրի աշխարհագրական դիրքի մասին՝ բառիս բուն և փոխաբերական իմաստներով։ Մեր երկրում այդպիսի սոցիալ-հոգեբանական ավանդույթ կա՝ ասել, թե մենք ինչպիսի վատ աշխարհագրական դիրքում ենք գտնվում, և առիթ ունեցել եմ ասելու, որ ներկա տարածաշրջանային և միջազգային պրոցեսների արդյունքում մեր երկրի աշխարհագրական դիրքը հաստատուն կերպով փոխվում է։ Սա շատ հետաքրքիր երևույթ է. մենք, բնականաբար, ոչ մի տեղ չենք գնում, մեր երկրի կոորդինատները չեն փոխվում, բայց աշխարհագրական դիրքը փոխվում է։
Եվ խոսելով մասնավորապես Ախուրիկ-Կայան գծի մասին՝ Ախուրիկը Թուրքիայի հետ սահմանային հատվածն է Շիրակի մարզում, Կայանը Տավուշի մարզում Հայաստանի և Ադրբեջանի միջև սահմանային բնակավայրն է։ Երբ խաղաղության գործընթացը սկսվեց և տեղի ունեցավ, և նախորդ տարի օգոստոսի 8-ին հաստատվեց խաղաղություն Հայաստանի և Ադրբեջանի միջև, մենք մի շատ անսպասելի հարց ստացանք մեր միջազգային գործընկերների կողմից՝ իսկ դուք գիտե՞ք, որ Արևելքի և Արևմուտքի միջև ամենակարճ ցամաքային ճանապարհն անցնում է ՀՀ-ով։ Եվ մենք ուղիղ և անկեղծ ասացինք՝ ոչ, չգիտենք։ Նման բաների մասին մտածելու առիթ պարզապես չենք ունեցել։
Հիմա, ըստ էության, այս ծրագրի մի բաղադրիչով մենք գործնական ուսումնասիրության պետք է ենթարկենք մեր միջազգային գործընկերների կողմից առաջարկված այն թեզը, որ Արևելքի և Արևմուտքի միջև անցնող ամենակարճ ճանապարհն անցնում է Հայաստանով, մասնավորապես՝ Կայանից մինչև Ախուրիկ՝ Տավուշի մարզ, Լոռու մարզ, Շիրակի մարզ։
Մենք մի քիչ ինտուիտիվ, մի քիչ էլ մտածված՝ այդ հատվածներում վերջին տարիներին ենթակառուցվածքների ոլորտում շատ մեծ ներդրումներ ենք անում։ Բացի այն բանից, որ Նոյեմբերյան-Իջևան-Երևան մայրուղու վրա շատ մեծ ներդրումներ ենք իրականացրել, նաև Տավուշի մարզում, Լոռու մարզում և Շիրակի մարզում մենք ներդրումներ ենք անում ենթակառուցվածքների ուղղությամբ։ Եվ պիտի կանխատեսենք։ Ի միջի այլոց, ուզում եմ այս առումով նշել Ենոքավան-Ջուջևան ավտոճանապարհը, Ենոքավան-Աթան ճանապարհի հեռանկարը։
Շատ մեծ է հավանականությունը, որ առաջիկա տասնամյակներում Կայան-Իջևան-Դիլիջան-Վանաձոր-Սպիտակ-Գյումրի-Ախուրիկ ավտոճանապարհը լինելու է մեր տարածաշրջանի ամենածանրաբեռնված ճանապարհներից մեկը։ Մենք այդ ճանապարհն ապահովելու համար պետք է այլընտրանքային ճանապարհներ ունենանք, որպեսզի կարողանանք այդ հիմնական գիծն ապահովել միջազգային բեռնափոխադրումների համար։ Իհարկե, այս խորհրդատվության արդյունքում մենք ամենակարճ ճանապարհն ավելի կկոնկրետացնենք»։
Դավիթ Խուդաթյանն ավելացրեց. «Մենք արդեն ավարտական փուլում ենք գտնվում Մարգարայի նոր կամրջի նախագծման մասով։ Սա մեր կարևոր նախաձեռնություններից է, և կարծում եմ՝ հաջորդիվ շատ մոտ կլինենք շինարարական փուլի մեկնարկին, արդեն այդ մասով կաշխատենք»։
Իսկ ինչ վերաբերում է նախագծին, ապա նախարարի խոսքով՝ մեկուկես տարի կտևի ամբողջ պրոցեսը, որից հետո կլինի արդեն նախնական նախագիծ, ինչը թույլ կտա շինարարական մրցույթ հայտարարել և շինարարության փուլ մտնել։ Այսինքն՝ «խոսքը շատ մեծ ժամանակահատվածի մասին չէ. ընդամենը մեկուկես տարի հետո մենք կարող ենք մոտ լինել շինարարության իրականացմանը՝ առնվազն այս կիլոմետրերի մասով»,- ասաց Խուդաթյանը։
ՊԵԿ նախագահ Էդուարդ Հակոբյանն էլ նշեց, որ կա մրցույթ՝ անցակետերի հետ կապված՝ Ախուրիկի ու Մարգարայի ընդլայնման համար, և դա ՎԶԵԲ-ի հետ է իրականացվում։ «Շուտով կունենանք կազմակերպություն, որը տեխնիկատնտեսական ուսումնասիրությունը կիրականացնի։ Նաև այս մասով ենք առաջ գնում»,- նշեց նա։









