Պետական եկամուտների կոմիտեի նախագահ Էդուարդ Հակոբյանն անդրադարձել է TRIPP նախագծի հատվածում միջազգային օպերատորի ներգրավմանը և դրա գործառույթներին։ Հավաստիացրել է՝ Հայաստանի Հանրապետությունը լիովին պահպանում է իր բոլոր մաքսային գործառույթներն ու պետական սուվերենությունը։
Նախատեսվում է, որ օպերատորը միայն պարզ գործողություններ կիրականացնի, որոնք որևէ կերպ չեն ազդի մաքսային վարչարարության արդյունավետության վրա։ Մինչդեռ ռիսկերի վերլուծությունը, զննումները և վերջնական որոշումների կայացումը մնում են բացառապես մաքսային ծառայողների տիրույթում։
Հակոբյանի խոսքով՝ միջազգային օպերատորի գործառույթների անհրաժեշտությունը պայմանավորված է նաև երկար տարիներ փակ սահմանների բացմամբ և կողմերի միջև վստահության մթնոլորտի ապահովմամբ։
«Եթե լինեն իրավիճակներ, որտեղ իրապես ռիսկ կա ու զննման կարիք կա, մաքսային աշխատողն է այդ որոշումը կայացնողը, և չի կարող ֆրոնտ օֆիսն այդպիսի որոշում կայացնել։ Բայց ինչ վերաբերում է հստակ այն ֆրոնտային գործառույթներին, թե ինչ պետք է անի, դա դեռ քննարկման փուլում է, կֆիքսվի համապատասխան պայմանագրով։ Բայց ես վստահեցնում եմ՝ մաքսային գործառույթներն ամբողջությամբ պետական սուվերենության տիրույթում են»,- ասել է նա։
