Եվրոպական խորհրդարանը Ադրբեջանի վերաբերյալ բանաձև է ընդունել, որով եվրոպացի պատգամավորներն ընդգծել են, որ Բրյուսելի և Բաքվի միջև ցանկացած ապագա գործընկերության համաձայնագիր պետք է պայմանավորված լինի մարդու իրավունքների ոլորտում շոշափելի բարելավումներով, այդ թվում՝ քաղբանտարկյալների ազատ արձակմամբ։
Պատգամավորները քննադատել են Ադրբեջանում քրեական և ազգային անվտանգության օրենսդրության չարաշահումը՝ հասարակական կազմակերպություններին ու անկախ լրատվամիջոցներին լռեցնելու նպատակով, ինչպես նաև արտերկրում բնակվող ընդդիմախոսների նկատմամբ իրականացվող ճնշումները։
Քաղաքական բանտարկյալների թվի վերաբերյալ հատվածում համառոտ հիշատակվում են նաև Բաքվում պահվող հայերը։
Ադրբեջանի Միլի Մեջլիսն արձագանքել է, եվրոպացի պատգամավորներին մեղադրել քաղաքական ճնշումների, երկակի ստանդարտների, լոբբիստական ազդեցության և ինքնիշխան պետության ներքին գործերին միջամտելու փորձերի համար:
