Սեպտեմբերի 29-ին Խորվաթիա կատարած աշխատանքային այցի ընթացքում Չեխիայի Հանրապետությունում Հայաստանի Հանրապետության արտակարգ և լիազոր դեսպան Աշոտ Հովակիմյանը հանդիպել է Խորվաթիայի արտաքին և եվրոպական գործերի նախարարության տնտեսական հարցերի և զարգացման համագործակցության գլխավոր տնօրինության տնօրեն Իրենա Ալայբեգի հետ: Այդ մասին տեղեկացնում է Պրահայում ՀՀ դեսպանությունը:
Դեսպան Հովակիմյանը ներկայացրել է Հայաստանի տնտեսության զարգացման ընթացիկ դինամիկան և արտահանման դիվերսիֆիկացման ուղղությամբ իրականացվող քայլերը՝ ընդգծելով ԵՄ կողմից Հայաստանին առևտրային ինքնավար միջոցներ տրամադրելու վերաբերյալ ընդունված կարգավորման կարևորությունը։
Հանդիպման ընթացքում քննարկվել են երկու երկրների միջև առևտրատնտեսական համագործակցության խորացման հնարավորություններն ու հեռանկարները:
Դեսպան Հովակիմյանը հանդիպել է նաև Խորվաթիայի Տնտեսական պալատի բիզնեսի միջազգայնացման կենտրոնի տնօրեն Սիլվա Ստիպիչ Կոբալյիի հետ:
Հանդիպման ընթացքում քննարկվել են երկու երկրների տնտեսական կապերն աշխուժացնելու և բիզնես համագործակցությունը խորացնելու հնարավորությունները:
