Հռոմի Պապ Լևոն XIV-ը սեպտեմբերի 25-ին ժամանել է Ֆրանսիա՝ հագեցած քառօրյա այցով: Նա ասել է, որ ցանկանում է «խաղաղության ուխտավոր» դառնալ պատերազմներով համակված մարդկության համար, և հույս է հայտնել, որ այդ ուղևորությունը կօգնի վերականգնելու Կաթոլիկ եկեղեցու հեղինակությունը, որը տուժել է չարաշահումների հետ կապված սկանդալների պատճառով՝ հաղորդում է Reuters-ը:
Փարիզ, հարավ-արևմուտքում գտնվող Լուրդի հայտնի կաթոլիկ սրբավայր և Գերմանիայի հետ սահմանային Մեց քաղաք այցերի ժամանակ Հռոմի Պապը նախատեսել է կրկին կոչ անել մշակելու արհեստական բանականության ստեղծման գլոբալ կանոններ և ներկայացնել Եվրոպայի ապագայի իր տեսլականը:
Շուրջ 600 հազար մարդ է գրանցվել մասնակցելու բացօթյա պատարագին, որը Սրբազան քահանայապետը կանցկացնի Փարիզի կենտրոնում: Ներքին գործերի նախարար Լորան Նունյեսը TF1 հեռուստաալիքի եթերում հայտնել է, որ միջոցառումների անվտանգությունն ապահովելու համար ներգրավել են իրավապահ մարմինների շուրջ 37 հազար աշխատակցի:
Ուրբաթ Հռոմի Պապի այցի ծրագիրը ներառում է Ելիսեյան պալատում ելույթներ նախագահ Էմանուել Մակրոնի և Ֆրանսիայի մյուս առաջնորդների, ինչպես նաև ՄԱԿ-ի կրթության, գիտության ու մշակույթի հարցերով կազմակերպության՝ ՅՈՒՆԵՍԿՕ-ի կենտրոնակայանի աշխատակիցների առջև:
