Իրանի արտաքին գործերի նախարարությունը ուրբաթ հայտարարել է, որ բոլոր երկրները պետք է ձեռնպահ մնան Իրանի դեմ ԱՄՆ-ի սահմանած միակողմանի պատժամիջոցների կիրառումից՝ դրանք որակելով անօրինական և անհիմն։
Իրանի արտաքին քաղաքական գերատեսչությունը ամերիկյան նոր պատժամիջոցներն անվանել է «պետական ահաբեկչության ակտ» և «մարդկության դեմ հանցագործություն»՝ պնդելով, որ դրանք վտանգում են միլիոնավոր իրանցիների առողջությունն ու կենսապահովումը։ Թեհրանը նաև հայտարարել է, որ այլ երկրների կողմից այդ պատժամիջոցների կիրառմանը մասնակցելը կնշանակի աջակցել ԱՄՆ-ի «անօրինական կամքին» և խոչընդոտել պետությունների միջև օրինական տնտեսական ու առևտրային հարաբերություններին։
Իրանի խորհրդարանի նախագահը, իր հերթին, շնորհակալություն է հայտնել Չինաստանին՝ ԱՄՆ-ի միակողմանի պատժամիջոցները քննադատելու համար։ Պեկինը հայտարարել է, որ դեմ է միջազգային իրավունքի հիմք չունեցող միակողմանի պատժամիջոցներին և նախազգուշացրել, որ անհրաժեշտության դեպքում կպաշտպանի իր օրինական շահերը։
ԱՄՆ նախագահ Դոնալդ Թրամփը անցած շաբաթ հայտարարել էր Իրանի նկատմամբ տնտեսական ճնշումն ուժեղացնելու արշավի մասին։ Օգոստոսի 24-ին ԱՄՆ ֆինանսների նախարար Սքոթ Բեսենթը հայտարարել էր «Տնտեսական վտարանդի» գործողության մեկնարկի մասին, որի նպատակն է սահմանափակել Իրանի տնտեսական և ֆինանսական կապերն աշխարհի հետ։ Վաշինգտոնը նաև սպառնում է երկրորդային պատժամիջոցներով այն երկրների և ընկերությունների նկատմամբ, որոնք կշարունակեն գործարքներ իրականացնել Իրանի հետ:
