Մեծ սիրով կողջունենք ՀՀ մեծարգո վարչապետի այցն Իրան, որտեղ կկարողանան ստորագրել ռազմավարական գործընկերության փաստաթուղթը. դեսպան
Ռազմավարական գործընկերության փաստաթղթի շրջանակում հայ-իրանական գործընկերության ինստիտուցիոնալացման ուղղությամբ մեր ցանկությունը և կամքը շատ լուրջ են ու վճռական: Տարբեր մակարդակներով այս մասին խոսվել է, և այս մասին հստակ հայտարարություններ են արվել: Այդ մասին ասուլիսի ժամանակ ասել է Հայաստանում Իրանի դեսպան Խալիլ Շիրղոլամին:
«Անցյալ շաբաթ, երբ մեծարգո Նիկոլ Փաշինյանն Իրանում հանդիպեց ԻԻՀ մեծարգո նախագահ պարոն Փեզեշքիանիի հետ, այս հանդիպման շրջանակում պարոն Փեզեշքիանը ևս մեկ անգամ ընդգծեց կարևորությունը և հնարավորինս արագ արդյունքի հասնելու անհրաժեշտությունը: Ուստի կարող ենք ասել, որ ԻԻՀ-ն իր կողմից շարունակ և հետամուտ կերպով աշխատում և քայլեր է ձեռնարկում ռազմավարական գործընկերության համապարփակ փաստաթղթի ստորագրման համար և վճռական կերպով շարունակում է այս ճանապարհին քայլեր ձեռնարկել:
Ռազմավարական գործընկերության փաստաթղթի տեքստի վրա այս պահին աշխատում ենք, և տեքստը ուսումնասիրության և կազմման փուլում է: Հուսով եմ՝ հնարավորինս արագ այս փուլը կավարտենք և կսկսենք աշխատանքները ստորագրման ուղղությամբ: Հնարավորինս պետք է աշխատենք այս փաստաթղթի ամփոփման և վերջնական տեսքի բերման համար: ԻԻՀ-ն մեծ սիրով կողջունի ՀՀ մեծարգո վարչապետ Նիկոլ Փաշինյանի այցը ԻԻՀ, որտեղ կկարողանան ստորագրել այս փաստաթուղթը:
Կարծում եմ՝ այս փաստաթղթով նոր մթնոլորտ կստեղծվի հայ-իրանական հարաբերություններում և նոր պատուհան կբացվի հետագա համագործակցության համար: Այդ թվում տարբեր ոլորտներում՝ թե՛ քաղաքական, թե՛ անվտանգության, թե՛ ներդրումների, թե՛ տնտեսական, թե՛ պաշտպանական, հստակ ուղենիշներ կտրվեն համագործակցության հետագա ուղղությունների համար»,- ասել է նա:
