«Լրագրողներ առանց սահմանների» միջազգային իրավապաշտպան կազմակերպությունը խիստ մտահոգություն է հայտնել Ադրբեջանում մեդիա դաշտի ոլորտում իրականացվող նոր օրենսդրական փոփոխությունների առնչությամբ:
Կազմակերպության գնահատմամբ՝ Բաքվի նոր նախաձեռնությունը նշանակում է «տեղեկատվության նախարարության» վերադարձ, որի նպատակն է ուժեղացնել կառավարության վերահսկողությունն անկախ տեղեկատվության նկատմամբ, մասնավորապես՝ թվային հարթակներում:
Ավելի վաղ Ադրբեջանի խորհրդարանում քննարկվել է նոր օրինագիծը, որով նախատեսվում է ստեղծել ԶԼՄ-ների և ռադիոհեռարձակման միասնական խորհուրդ: Այս նոր մարմինը մեկտեղելու է նախկինում տարբեր կառույցների միջև բաժանված լիազորությունները և իր ձեռքում է կենտրոնացնելու երկրի ողջ մեդիա հատվածի կարգավորումն ու վերահսկողությունը:
Իրավապաշտպանները շեշտում են, որ այն պայմաններում, երբ ադրբեջանցի վերջին անկախ լրագրողները բանտարկված են, աքսորված կամ ստիպված են աշխատել ընդհատակում, այս օրենքը պաշտոնական Բաքվին տալիս է մամուլը վերջնականապես վերահսկելու բոլոր լծակները:
