Շրջակա միջավայրի նախարար Համբարձում Մաթևոսյանը աշխատանքային այցով մեկնել է Կորեա
Շրջակա միջավայրի նախարար Համբարձում Մաթևոսյանը աշխատանքային այցով մեկնել է Կորեայի Հանրապետություն՝ Սեուլ, որտեղ կմասնակցի «Կայուն օվկիանոսների նախաձեռնություն» (SOI Global Dialogue) միջազգային բարձր մակարդակի գլոբալ երկխոսությանը։ Այս մասին տեղեկացնում են ՀՀ շրջակա միջավայրի նախարարությունից:
SOI Global Dialogue-ը ՄԱԿ-ի «Կենսաբանական բազմազանության մասին» կոնվենցիայի շրջանակում իրականացվող կարևոր միջազգային հարթակներից է, որը համախմբում է կառավարությունների, միջազգային կազմակերպությունների և ոլորտային կառույցների բարձրաստիճան ներկայացուցիչներին՝ ծովային և առափնյա կենսաբազմազանության պահպանության, բնական ռեսուրսների կայուն օգտագործման և միջազգային համագործակցության ամրապնդման նպատակով։
Այցի շրջանակում նախատեսված են նաև երկկողմ հանդիպումներ պետական գերատեսչությունների ղեկավարների, ինչպես նաև միջազգային կազմակերպությունների բարձրաստիճան ներկայացուցիչների հետ, որոնց ընթացքում կքննարկվեն COP17-ի նախապատրաստական գործընթացին, կենսաբազմազանության պահպանությանը, կլիմայական քաղաքականությանը և բնապահպանական համագործակցության ընդլայնմանը վերաբերող հարցեր։
