Չինաստանի նախագահ Սի Ծինփինը ուրբաթ Պեկինում հանդիպել է Թայվանի ընդդիմադիր «Գոմինդան» կուսակցության նախագահ Չժեն Լիվենի հետ, հաղորդում են ասիական լրատվամիջոցները։
«Անկախ նրանից, թե ինչպիսին է միջազգային իրավիճակը, Թայվանի նեղուցի երկու կողմերում հայրենակիցների մերձեցման և միավորման մեծ ալիքը չի փոխվի։ Դա պատմականորեն անխուսափելի է»,- ասել է Չինաստանի առաջնորդը։
Նա նշել է, որ «Թայվանի անկախությունը» Թայվանի նեղուցում լարվածության գլխավոր պատճառն է և հավելել, որ «դա չենք հանդուրժի ու թույլ չենք տա»։
Ի պատասխան՝ Չժեն Լիվենը հայտարարել է, որ իրենք «համատեղ կգործարկեն չինական քաղաքակրթության վերածննդի նախագիծը»։ Նա նաև վստահեցրել է, որ «նեղուցի երկու կողմում ապրող ժողովուրդները կհարգեն միմյանց և կշարժվեն միմյանց ընդառաջ»։
Արևմտյան լրատվամիջոցները նշել են, որ Չինաստանի նախագահի և թայվանական կուսակցությունների ներկայացուցիչների հանդիպումը հազվադեպ իրադարձություն է։ Սա Սի Ծինփինի և «Գոմինդան» կուսակցության առաջնորդի առաջին շփումն է վերջին տասնամյակում։
