Ընտրական օրենսգրքում այս կարգավորումն ինքնին լավն է, բայց քանի որ ժամկետները խնդրահարույց են, ո՛չ քննադատում ենք, ո՛չ էլ ողջունում. Դանիել Իոաննիսյան
Ինչպես ավելի վաղ հայտնել էինք, ԱԺ արտահերթ նիստին հրատապության կարգով քննվում է 4 նախագիծ, որոնցից մեկը վերաբերում է Ընտրական օրենսգրքին:
«Իրազեկ քաղաքացիների միավորում» ՀԿ նախագահ Դանիել Իոաննիսյանից այսօր լրագրողները հետաքրքրվեցին Ընտրական օրենսգրքին առնչվող նախագծի վերաբերյալ:
Իոաննիսյանի խոսքով՝ քննարկվում է երկու փոփոխություն, մեկը վերաբերում է քվեաթերթիկների անվավերության հետ կապված հարցին:
«Դա մի հարց է, որը մենք քաղհասարակության գործընկերներով ենք նախագծել և պահանջել, որ իշխանություններն ընդունեն, ինչը և նրանք անում են»,- ասաց նա:
Ինչ վերաբերում է դաշինքների անվանման մեջ անձնանունների, տեղանունների և պետությունների անվանումների արգելքի կարգավորմանը, նշեց՝ այդ կարգավորումը կար մի քանի տարի առաջ:
«2024-ի փոփոխություններով, ինչպես ասացի, տեխնիկական վրիպակի հետևանքով դուրս է եկել և հիմա հետ է բերվում: Մեր մոտեցումը հետևյալն է՝ որ այդ կարգավորումը պետք է, մենք ինքներս ենք առաջարկ արել տարիներ առաջ, բայց այդ արգելքը ընտրություններից երկու ամիս առաջ տանելը իհարկե խնդրահարույց է»,- նշեց նա՝ հավելելով, որ եթե այս փոփոխությունը լիներ մի քանի ամիս առաջ գոնե, իրենք այս փոփոխությունը կողջունեին:
Նրա խոսքով՝ սա ակնհայտորեն խնդիրներ է ստեղծում, որ որոշ քաղաքական ուժեր որոշակի բրենդինգ են ձևավորել կամ ձևավորում և այդ բրենդինգի փոփոխության կարիք են ունենալու:
«էս մեկը մենք չենք նախաձեռնել, և մեր մոտեցումն այն է, որ այս կարգավորումը ինքնին լավն է, բայց քանի որ ժամկետները խնդրահարույց են, ոչ քննադատում ենք, ոչ էլ ողջունում»,- հավելեց «Իրազեկ քաղաքացիների միավորում» ՀԿ նախագահը:
Բաժիններ
Դիտումներ60
