Կրեմլի խոսնակ Դմիտրի Պեսկովը լրագրողների հետ զրույցում անդրադարձել է Երևան և Բաքու ԱՄՆ փոխնախագահի այցերին, հայտարարել՝ Հայաստանն ու Ադրբեջանը՝ որպես ինքնիշխան պետություններ, իրավունք ունեն հարաբերություններ կառուցել տարբեր երկրների հետ։ Պեսկովն այսպես է պատասխանել հարցին՝ արդյոք Մոսկվան մտահոգվա՞ծ է հարավկովկասյան երկրների և Վաշինգտոնի միջև խորացող համագործակցությամբ։ «Մենք ունենք երկկողմ հարաբերությունների լայն շրջանակ և՛ Բաքվի, և՛ Երևանի հետ։ Իհարկե մտադիր ենք ավելի զարգացնել շփումները մեր գործընկերների հետ»,- հավելել է Պեսկովը։ Նա նշել է, որ ԵԱՏՄ-ի դերն էլ Հայաստանի տնտեսական արագ զարգացման գործում ակնհայտ է: Ըստ նրա՝ դժվար թե որևէ մեկը վիճարկի դա:
Կրեմլի խոսնակը նաև կարծիք է հայտնել, որ Ռուսաստանը աշխարհի ամենաառաջադեմ երկիրն է ատոմային էներգիայի ոլորտում, ավելի մեծ կարողություններ ունի և ավելի մրցունակ է: «Հայաստանում կան խորհրդային և ռուսական նախագծման հին օբյեկտներ։ Այստեղ Ռուսաստանն ավելի մեծ փորձ ունի: Մենք ի վիճակի ենք ապահովել ավելի լավ որակ առաջիկա տարիներին՝ ավելի քիչ գումարով»,- շարունակել է ռուս պաշտոնյան։
Նրա խոսքով՝ Մոսկվան մտադիր է զարգացնել փոխշահավետ հարաբերությունները Երևանի և Բաքվի հետ, այդ թվում՝ ներդրումների և մշակույթի ոլորտներում։
