Մասնագիտական կրթությունը՝ մարզային տնտեսության ողնաշար․ քննարկում ԵՆԲ ներկայացուցիչների հետ
ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր ընդունել է Եվրոպական ներդրումային բանկի (ԵՆԲ) Հարավային Կովկասի տարածաշրջանային ներկայացուցչության ղեկավար Ստելլա Ռենիտայի գլխավորած պատվիրակությանը։ Հանդիպմանը մասնակցել է նաև ԿԳՄՍ նախարարի տեղակալ Արթուր Մարտիրոսյանը։
Կողմերը քննարկել են կրթության ոլորտում Եվրոպական ներդրումային բանկի համագործակցությամբ իրականացվող ծրագրերը և ապագա նախաձեռնությունները՝ կարևորելով դրանց ընդլայնման հնարավորությունները։ Նախարար Ժաննա Անդրեասյանն ընդգծել է ԵՆԲ-ի հետ արդյունավետ և շարունակական համագործակցության կարևորությունը՝ հատկապես մարդկային կապիտալի զարգացման, կրթական ենթակառուցվածքների բարելավման ու որակյալ կրթության հասանելիության ապահովման համատեքստում։
Առանձնակի կարևորվել են «Դիմակայուն Սյունիք Թիմ Եվրոպա» նախաձեռնության շրջանակում իրականացվող աշխատանքները: Ծրագրի նպատակը Սյունիքի մարզի կայուն սոցիալ-տնտեսական զարգացումն է: Այն իրականացվում է Եվրոպական միության, Եվրոպական ներդրումային բանկի, Վերակառուցման և զարգացման եվրոպական բանկի, ԵՄ անդամ երկրների՝ Ավստրիայի, Չեխիայի, Էստոնիայի, Ֆինլանդիայի, Ֆրանսիայի, Գերմանիայի, Լիտվայի, Նիդերլանդների, Լեհաստանի, Շվեդիայի, ինչպես նաև գործընկեր հանդիսացող Շվեյցարիայի համատեղ նախաձեռնությամբ: Նշվել է, որ ԵՆԲ աջակցությամբ Սյունիքի մարզում ներկայում աշխատանքներ են իրականացվում մասնագիտական կրթության ոլորտում ենթակառուցվածքների բարելավման և զարգացման ուղղությամբ, որի շրջանակում նախատեսվում են նաև միջին մասնագիտական երկու հաստատությունների վերանորոգման, արդիականացման և վերազինման աշխատանքներ ու գույքով և ժամանակակից ուսումնական լաբորատորիաներով համալրում։
ԿԳՄՍ նախարարը համոզմունք է հայտնել՝ մասնագիտական կրթության և ուսուցման համակարգը պետք է դառնա մարզային տնտեսության ողնաշարը՝ պատրաստելով մասնագետների, որոնք հետագայում իրենց տեղը կգտնեն աշխատաշուկայում։
Ժաննա Անդրեասյանը ներկայացրել է նաև ՀՀ Կառավարության՝ կրթության ոլորտի առաջնահերթությունները՝ շեշտելով դպրոցների և մանկապարտեզների կառուցման, վերակառուցման և վերանորոգման ծրագրի հաջորդ փուլի շրջանակում ակնկալվող համագործակցությունն ու կրթության ոլորտում նախատեսվող այլ կարևոր նախաձեռնություններ։
Եվրոպական ներդրումային բանկի Հարավային Կովկասի տարածաշրջանային ներկայացուցչության ղեկավար Ստելլա Ռենիտան շնորհակալություն է հայտնել ընդունելության համար՝ ընդգծելով ԿԳՄՍ նախարարության հետ արդյունավետ և շարունակական համագործակցության կարևորությունը։
Հանդիպման ավարտին կողմերը քննարկել են նաև երկկողմ հետաքրքրություն ներկայացնող մի շարք այլ հարցեր՝ վերահաստատելով փոխգործակցության խորացման պատրաստակամությունը։
