ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ը 6 տարեկան է
«Հայհիդրոմետ» ՊՈԱԿ-ը ստեղծվել է Հայաստանի Հանրապետության Կառավարության 2020 թվականի հունվարի 30-ի N 81-Ն որոշմամբ՝ «Շրջակա միջավայրի մոնիթորինգի և տեղեկատվության կենտրոն», «Անտառային մոնիթորինգի կենտրոն» և «Հիդրոօդերևութաբանության և մթնոլորտային երևույթների վրա ակտիվ ներգործության ծառայություն» պետական ոչ առևտրային կազմակերպությունների միաձուլման արդյունքում։
«Հայհիդրոմետ» ՊՈԱԿ-ը հանդիսանում է առաջնային կառույց, որը նպաստում է շրջակա միջավայրի պահպանությանը՝
- իրականացնելով հիդրոօդերևութաբանական և ռադիոլոկացիոն դիտարկումներ, մթնոլորտային օդի, ջրային ռեսուրսների, անտառների, կենսաբազմազանության մոնիթորինգ, հողերի աղտոտվածության հետազոտություններ,
- ուսումնասիրելով կլիմայի փոփոխության ազդեցությունը էկոհամակարգերի վրա,
- աջակցելով էկոլոգիական անվտանգության պետական քաղաքականության իրականացմանը,
- կատարելով տվյալների համակարգված հավաքագրում, մշակում, վերլուծություն և տարածում։
Կենտրոնի կողմից տրամադրվող օպերատիվ և գիտականորեն հիմնավորված տվյալներն ու կանխատեսումները կարևոր հիմք են վաղ նախազգուշացման, կլիմայական և բնական ռիսկերի գնահատման, հանրային առողջության պաշտպանության, ինչպես նաև պետական կառավարման և ռազմավարական որոշումների կայացման համար։
ՇՄ նախարարությունը շնորհավորում է «Հայհիդրոմետ» ՊՈԱԿ-ի ողջ թիմին և գործընկեր կազմակերպություններին՝ նվիրված աշխատանքի, բարձր պատասխանատվության և արդյունավետ համագործակցության համար, որոնց շնորհիվ ձևավորվել և զարգանում է կենտրոնի կարևոր առաքելությունը։
