Հայաստանի հավաքականի և Երևանի «Փյունիկի» կիսապաշտպան Էրիկ Վարդանյանը կարող է կարիերան շարունակել Ռուսաստանի առաջնությունում: Այդ մասին գրում է Championat.com կայքը:
Վարդանյանը կարող է մի քանի տարվա պայմանագիր ստորագրել Սոչիի համանուն ակումբի հետ: Նախնական տեղեկություններով՝ հայ կիսապաշտպանը ռուսական ակումբին կմիանա հունվարին:
Հայաստանի ֆուտբոլի առաջնության 12-րդ տուրում կայացած «Արարատ»-«Փյունիկ» խաղում Էրիկ Վարդանյանը մրցավարին ուսով հարվածելու համար կարմիր քարտ էր ստացել, որից հետո մարզադաշտը լքելիս միջնամատ էր ցույց տվել երկրպագուներին: ՀՖՖ կարգապահական կոմիտեն որոշում էր ընդունել Էրիկ Վարդանյանին որակազրկել մինչև 2020 թվականի ապրիլի 30-ը` 6 ամսով, իսկ «Փյունիկ» ֆուտբոլային ակումբին տուգանել 600 հազար դրամով: Ֆուտբոլիստը հետագայում ներողություն էր խնդրել պահվածքի համար:
