Ներկայացվել են ԲՀՊՏ և անտառային ոլորտում ռենջերների կարողությունների գնահատման շրջանակային մոտեցումները

Երևանում՝ Բնության համաշխարհային հիմնադրամի Հայաստանի գրասենյակում (WWF-Armenia), «Կենսաբազմազանություն և կայուն տեղական զարգացում Հայաստանում» ծրագրի շրջանակում տեղի է ունեցել աշխատանքային հանդիպում, որին մասնակցել են «PROPARK» ընկերության աշխատակիցները, ՇՄՆ էկոպարեկային ծառայության կառուցվածքային ստորաբաժանումների ղեկավարները, շրջակա միջավայրի նախարարության և «Հայանտառ» ՊՈԱԿ-ի ներկայացուցիչներ, բնության հատուկ պահպանվող տարածքների ղեկավար կազմը, WWF հայաստանյան մասնաճյուղի տնօրենը և այլոք։ Այս մասին հայտնում է ծառայությունը:

Հանդիպման ընթացքում ներկայացվել են ԲՀՊՏ և անտառային ոլորտում ռենջերների կարողությունների գնահատման շրջանակային մոտեցումները։ Քննարկվել են դրանց կառավարման շրջափուլի բաղադրիչները, մասնավորապես՝ համատեքստի գնահատում, պլանավորում, ներդրումների անհրաժեշտություն, կառավարման գործընթացներ, արդյունքներ և դրանց գնահատում։

Հատուկ ուշադրություն է դարձվել ՇՄՆ էկոպարեկային ծառայության՝ որպես ազգային ռենջերական կառույց լինելու կարևորությանը, ինչպես նաև նրա հիմնական առաքելությանը՝

կանխարգելել և դադարեցնել անօրինական գործողությունները և բնապահպանական հանցագործությունները,

նվազեցնել մարդածին ճնշումները բնության նկատմամբ,

ապահովել բնակավայրերի ու տեսակների պահպանությունը,

բարձրացնել համայնքների իրազեկվածությունը,

աջակցել զբոսաշրջության կայուն զարգացմանը։