Երկուշաբթի՝ նոյեմբերի 10-ին, Փարիզի վերաքննիչ դատարանը բավարարել է Ֆրանսիայի նախկին նախագահ Նիկոլա Սարկոզիի փաստաբանների ներկայացրած միջնորդությունը և որոշում է կայացրել բանտից ազատ արձակել նրան: Սարկոզին կգտնվի խիստ դատական հսկողության ներքո՝ հաղորդում է BFM TV-ն։
Սարկոզին բանտում անցկացրել է գրեթե երեք շաբաթ։ Ֆրանսիայի պատմության մեջ դա առաջին դեպքն է եղել, երբ հանրապետության նախկին նախագահը հայտնվել է ճաղերի հետևում։ Այդ ընթացքում քաղաքական գործիչը տհաճ բանտային պայմանների է բախվել՝ անընդհատ ծաղրուծանակի ենթարկվելու պատճառով: Սարկոզին կտրուկ կրճատել էր իր սննդակարգը՝ առողջության հետ կապված մտահոգությունների պատճառով և համաձայնել էր ուտել միայն յոգուրտ՝ այն համարելով միակ անվտանգ սնունդը:
Բանտից դուրս գալուց հետո նախկին նախագահը, որը 5 տարվա ազատազրկման էր դատապարտվել անօրինական քարոզարշավի ֆինանսավորման համար, պարտավոր է կրել «էլեկտրոնային շղթա»։ Նրան կարգելվի բացակայել երկրից, կապ հաստատել իր գործով մեղադրյալների ու վկաների հետ։
