Թուրքիայի արտգործնախարար Հաքան Ֆիդանը հանդես է եկել մի շարք հայտարարություններով ԵՄ ինտեգրման, ռուս-ուկրաինական հակամարտության, Գազայի իրավիճակի հարցերի վերաբերյալ:
Թուրքիայի համար շարունակում է առաջնային լինել եվրաինտեգրման հարցը: Ըստ Ֆիդանի՝ Թուրքիայի նախագահը հայտարարել է, որ Անկարան վճռական քայլեր է ակնկալում Եվրամիությանը Թուրքիայի անդամակցության գործընթացում։ «Մենք բազմիցս ասել ենք` պահն է, որ Թուրքիայի և Եվրամիության հարաբերությունները զարգանան՝ հաշվի առնելով երկարաժամկետ ընդհանուր շահերը։ Ռեջեփ Թայիփ Էրդողանն արտահայտել է այս հարցում իր քաղաքական կամքը»,- ընդգծել է արտգործնախարարը:
Ինչ վերաբերում է ռուս-ուկրաինական հակամարտությանը, ապա Հաքան Ֆիդանն ընդունել է, որ ռուս-ուկրաինական պատերազմի դադարեցման շուրջ բանակցություններում որոշակի դժվարություններ կան:
Արտգործնախարարն ընդգծել է հակամարտող կողմերի միջև արդար և երկարատև խաղաղության կարևորությունը։ «Անկարան կշարունակի նպաստել բանակցություններին»,- հավելել է դիվանագետը։
Ֆիդանն անդրադարձել է Գազայի հատվածում իրավիճակին, տեղեկացրել, որ Ստամբուլում նոյեմբերի 3-ին նախատեսված է հրադադարի հարցով հերթական հանդիպումը:
