ԱՄՆ կառավարությունն ապացույցներ ունի, որ Գազայի հատվածում Իսրայելի զինվորականները մարդու իրավունքների հարյուրավոր հնարավոր խախտումներ են թույլ տվել։ Այդ մասին հաղորդել է The Washington Post-ը՝ հղում անելով ԱՄՆ պետքարտուղարության գլխավոր տեսուչի գրասենյակի գաղտնի զեկույցին։
Ըստ թերթի՝ զեկույցը պարունակում է տեղեկություններ, որոնք վկայում են, որ Իսրայելի զինվորականները մարդու իրավունքների հարյուրավոր հնարավոր խախտումներ են թույլ տվել, որոնց «նախաքննության համար տարիներ կպահանջվեն»։ Թերթը ընդգծում է, որ սա առաջին զեկույցն է, որում ԱՄՆ-ն «ճանաչում է Իսրայելի գործողությունների ծավալները Գազայում», և որը ենթակա է Լիհի օրենքին։ Այդ օրենքի համաձայն՝ ԱՄՆ -ը չպետք է ռազմական օգնություն տրամադրի օտարերկրյա ռազմական ստորաբաժանումներին, որոնք, ըստ հավաստի տեղեկությունների, մարդու իրավունքների կոպիտ խախտումներ են կատարել:
WP-ը տեղեկացնում է, որ զեկույցը պատրաստվել է հոկտեմբերի 10-ին Գազայում հրադադարի ռեժիմի ուժի մեջ մտնելուց մի քանի օր առաջ:
