Վրաստանում խորհրդարանական մեծամասնությունը, որը ներառում է իշխող «Վրացական երազանք» կուսակցությունն ու ևս երկու խորհրդարանական խմբեր, հայց է ներկայացրել Սահմանադրական դատարան՝ պահանջելով արգելել հակապետական և հակասահմանադրական գործողությունների համար մեղավոր ճանաչված քաղաքական կուսակցությունների գործունեությունը՝ հայտարարել է խորհրդարանի խոսնակ Շալվա Պապուաշվիլին։
«Մենք կողմ ենք «Միացյալ ազգային շարժում», «Հանուն փոփոխությունների» և «Հզոր Վրաստան - Լելո» կուսակցությունները հակասահմանադրական ճանաչելուն»,- հայտարարել է նա։
Խորհրդարանի խոսնակը հայց ներկայացնելու հիմք է համարել խորհրդարանական ժամանակավոր քննիչ հանձնաժողովի եզրակացությունը, որը մի քանի ամիս ուսումնասիրել է տարբեր քաղաքական ուժերի գործողությունները և, առաջին հերթին, Վրաստանի նախկին նախագահ Միխեիլ Սաակաշվիլու ստեղծած «Միացյալ ազգային շարժում» կուսակցության գործունեությունը:
Եթե Սահմանադրական դատարանը բավարարի հայցը, օրենքը խախտող քաղաքական կուսակցություններին կամ նրանց հետ կապված անձանց կարգելի մասնակցել ընտրություններին։ Այդ կուսակցությունների անդամներին կարգելվի նաև պետական պաշտոններ զբաղեցնել և նոր կուսակցություններ ստեղծել։
Տեղական լրատվամիջոցների փոխանցմամբ՝ Վրաստանի Սահմանադրական դատարանը հայցի վերաբերյալ որոշում կկայացնի առաջիկա ամիսներին։
