Թուրքիան Մեծ Բրիտանիայի հետ պայմանագիր է կնքել 9 միլիարդ եվրո արժողությամբ 20 նոր բրիտանական Eurofighter կործանիչի գնումների համար։ Պայմանագիրը ստորագրվել է վարչապետ Քիր Սթարմերի՝ Թուրքիա կատարած առաջին այցի ժամանակ՝ հաղորդում է Euronews-ը։
Թուրքիայի նախագահ Ռեջեփ Էրդողանը պայմանագիրն անվանել է «երկու մտերիմ դաշնակիցների միջև ռազմավարական հարաբերությունների նոր խորհրդանիշ»։ Սթարմերն էլ հավելել է, որ փաստաթուղթը նախատեսում է ապագայում ավելի շատ ինքնաթիռների վաճառքի հնարավորություն։
Հուլիսին Անկարան և Լոնդոնը նախնական պայմանագիր էին կնքել Eurofighter կործանիչների գնման համար, որոնք արտադրում են Մեծ Բրիտանիայի, Գերմանիայի, Իտալիայի և Իսպանիայի կոնսորցիումը, որն էլ գլխավորում է բրիտանական BAE Systems ընկերությունը։
Գործարքը կնքվել է, երբ Գերմանիան խոստացել է դեմ չլինել Թուրքիային կործանիչների վաճառքին։
Անկարան Eurofighters-ների և մյուս ժամանակակից կործանիչների գնումը դիտարկում է որպես միջանկյալ լուծում, մինչև տեղական արտադրության KAAN հինգերորդ սերնդի կործանիչի շահագործման հանձնելը։ Սպասվում է, որ դա տեղի կունենա 2028 թվականից ոչ շուտ։
