Ֆրանսիայի նախագահ Էմանուել Մակրոնը հայտարարել է, որ Գազայում հրադադարի վերաբերյալ համաձայնության ձեռքբերումը մեծ հույս է տվել պատանդներին և նրանց ընտանիքներին, Գազայի պաղեստինցիներին և ամբողջ տարածաշրջանին: Նա նաև շնորհակալություն է հայտնել ԱՄՆ նախագահին և մյուս միջնորդներին:
«Բոլոր կողմերին կոչ եմ անում խստորեն պահպանել դրա պայմանները: Այս համաձայնագիրը պետք է նշանավորի պատերազմի ավարտը և երկու պետության բանաձևի վրա հիմնված քաղաքական լուծման սկիզբը։ Ֆրանսիան պատրաստ է իր ներդրումն ունենալ այս նպատակին հասնելու գործում»,- նշել է Մակրոնը:
Մեծ Բրիտանիայի վարչապետ Քիր Սթարմերը նույնպես ոջունել է Գազայում խաղաղության ծրագրի առաջին փուլի շուրջ համաձայնության հասնելու լուրը:
«Այժմ այս համաձայնագիրը պետք է ամբողջությամբ և անհապաղ կյանքի կոչվի և ուղեկցվի Գազային կյանքեր փրկող մարդասիրական օգնություն հասցնելու բոլոր սահմանափակումների անհապաղ վերացմամբ»,- նշել է Սթարմերը:
ՄԱԿ-ի գլխավոր քարտուղար Անտոնիու Գուտերեշը բոլոր շահագրգիռ կողմերին կոչ է արել լիովին պահպանել համաձայնագրի դրույթները, ապահովել պատանդների արժանապատիվ վերադարձը, մշտական հրադադար և մարդասիրական օգնության անարգել մուտքը Գազայի հատված: Նա հորդորել է օգտվել ստեղծված հնարավորությունից՝ դադարեցնելու օկուպացիան, ճանաչելու պաղեստինցի ժողովրդի ինքնորոշման իրավունքը, որը կհանգեցնի երկու պետության բանաձևով խնդրի լուծմանը։
