Իսրայելի վարչապետ Բենիամին Նեթանյահուն ելույթ է ունեցել ՄԱԿ-ի Գլխավոր վեհաժողովի նստաշրջանում և ամբիոնից կոչ արել պաղեստինյան արմատական ՀԱՄԱՍ շարժմանը անհապաղ զենքերը վայր դնել և ազատ արձակել իսրայելցի 48 պատանդին։
«Եթե դուք դա անեք, կապրեք։ Հակառակ դեպքում Իսրայելը կհասնի ձեզ և կոչնչացնի բոլորիդ։ Եթե ՀԱՄԱՍ-ը համաձայնի մեր պահանջներին, պատերազմը կարող է ավարտվել հենց հիմա»,- հայտարարել է Նեթանյահուն։
Նա այն համոզմանն է, որ իր երկրի հաղթանակը Գազայի հատվածում արմատական պաղեստինյան ՀԱՄԱՍ շարժման նկատմամբ կարող է Իսրայելը մոտեցնել տարածաշրջանի մյուս պետությունների հետ խաղաղությանը։
Նեթանյահուն խոսել է նաև Իրանի մասին և պահանջել ոչնչացնել այդ երկրի տարածքում գտնվող հարստացված ուրանի բոլոր պաշարները։
ԶԼՄ-ները գրել են, որ Իսրայելի վարչապետի ելույթը դիմավորել են բողոքի ցույցերով։ Դահլիճում նրա հայտնվելու ժամանակ հնչել են դժգոհության բացականչություններ: Որոշ պատվիրակություններ դուրս են եկել Գլխավոր վեհաժողովի դահլիճից՝ ի նշան բողոքի, երբ նա մոտեցել է ամբիոնին։ Դահլիճից հեռացողների մեջ եղել են արաբական երկրների ներկայացուցիչներ, մի քանի պատվիրակություն էլ ընդհանրապես ներկա չի եղել Նեթանյահուի ելույթին։
