Վաշինգտոնը թույլ չի տա նախագահ Մահմուդ Աբբասին և Պաղեստինի մի շարք այլ ներկայացուցիչների հաջորդ ամիս մեկնել Նյու Յորք՝ մասնակցելու ՄԱԿ-ի գլխավոր վեհաժողովին: Reuters-ի տվյալով՝ ԱՄՆ պետքարտուղարությունը կմերժի կամ կչեղարկի նրանց վիզաները։
Ավելի վաղ տեղեկություններ էին ստացվել, որ Ֆրանսիայի և Սաուդյան Արաբիայի հյուրընկալած գագաթնաժողովին Մեծ Բրիտանիան, Ֆրանսիան, Ավստրալիան և Կանադան պատրաստվում են պաշտոնապես ճանաչել Պաղեստին պետությունը։ Մահմուդ Աբբասը դատապարտել է ամերիկյան կողմի որոշումը՝ նշելով, որ դա միջազգային իրավունքի խախտում է: Ֆրանսիան ևս կոչ է արել Միացյալ Նահանգներին վերանայել պաղեստինյան իշխանության ներկայացուցիչների դեմ կիրառված սահմանափակումը:
Պետքարտուղարության հիմնավորմամբ՝ նման որոշում են կայացրել, քանի որ կարծում են, որ Պաղեստինյան իշխանությունը չի հրաժարվել ծայրահեղական մոտեցումներից, առաջ է տանում Պաղեստին պետության ճանաչման գաղափարը և խոչընդոտում է Գազայի հատվածում խաղաղության հասնելու ջանքերը:
