Էլեկտրամատակարարման որակի բարձրացման և համակարգի արդիականացման վերաբերյալ Լոռու մարզպետի պաշտոնակատարն այսօր խորհրդակցություն է անցկացրել

Լոռու մարզպետի պաշտոնակատար Հովհաննես Ավետիսյանը օգոստոսի 26-ին խորհրդակցություն է անցկացրել մարզի համայնքների ղեկավարների հետ՝ քննարկելու բնակավայրերում էլեկտրամատակարարման ծառայությունների որակի բարձրացմանը, համակարգի արդիականացմանը և ոլորտի զարգացման գործընթացներին վերաբերող հարցեր: Այս մասին տեղեկացնում են Լոռու մարզպետի աշխատակազմից։

Հանդիպմանը մասնակցել է նաև «Հայաստանի էլեկտրական ցանցեր» ՓԲ ընկերության «Դեբեդ» մասնաճյուղի նորանշանակ տնօրեն Տիգրան Հովսեփյանը:

Մարզպետի պաշտոնակատար Հովհաննես Ավետիսյանն իր խոսքում ընդգծել է, որ պետությունը շարունակում է լայնածավալ աշխատանքներ տանել ոլորտի կարգավորման և ենթակառուցվածքների բարելավման ուղղությամբ։

Նա կարևորել է համայնքապետերի և ՀԷՑ-ի փոխհամագործակցությունը՝ նշելով, որ միասնական ջանքերով կարելի է հասնել այնպիսի արդյունքների, որոնք անմիջականորեն կզգան մարզի բնակիչները:

Տիգրան Հովսեփյանը ևս կարևորել է համայնքների հետ շարունակական համագործակցությունը և նշել, որ միայն սերտ գործակցության միջոցով է հնարավոր օպերատիվ արձագանքել էլեկտրամատակարարման խնդիրներին և բնակչության համար ապահովել հուսալի և անխափան էլեկտրամատակարարում:

Նա հորդորել է «Դեբեդ» մասնաճյուղի աշխատանքներն ավելի օպերատիվ և արագ կազմակերպելու նպատակով բնակավայրերում կամ այլ տարածքներում էլեկտրաէներգիայի ընդհատումների դեպքում զանգահարել և խնդրի մասին բարձրաձայնել ՀԷՑ-ի «Թեժ գիծ» կամ մասնաճյուղի տարծքային վարչական մասերի օպերատիվ շրջիկ խմբերին(ՕՇԽ):

Հանդիպման ընթացքում համայնքապետերը բարձրաձայնել են իրենց բնակավայրերում առկա խնդիրները: ՀԷՑ-ի պաշտոնյաների հետ քննարկվել են ենթակառուցվածքների արդիականացմանը և զարգացմանը, բնակավայրերում համակարգային անհետաձգելի խնդիրների լուծմանը վերաբերող հարցեր և լուծումների հնարավոր տարբերակներ:

Էլեկտրամատակարարման որակի բարձրացման և համակարգի արդիականացման վերաբերյալ Լոռու մարզպետի պաշտոնակատարն այսօր խորհրդակցություն է անցկացրել

Այս թեմայի շուրջ