Ուկրաինայում ԱՄՆ նախագահ Դոնալդ Թրամփի կողմից ՌԴ նախագահ Վլադիմիր Պուտինին ներկայացրած հրադադարի վերաբերյալ վերջնագրի ժամկետի լրանալու օրը Ռուսաստանն անօդաչու թռչող սարքերով նոր զանգվածային հարվածներ է հասցրել Ուկրաինային: Ռուսական ուժերը ավելի քան 100 օդային հարձակում են իրականացրել, այդ թվում՝ «Շահեդ» տիպի հարվածային անօդաչու թռչող սարքերով, տարբեր տեսակի դրոնների իմիտատորներով, ինչպես նաև 8 ռեակտիվ անօդաչու թռչող սարքերով, հայտարարել է Ուկրաինայի ռազմաօդային ուժերը Telegram-ում:
Ուկրաինական ստորաբաժանումներին հաջողվել է երկրի հյուսիսում, հարավում, արևելքում և կենտրոնում խոցել կամ ճնշել 82 ռուսական անօդաչու թռչող սարք: Հարվածներն իրականացվել են Սմոլենսկից, Կրասնոդարի երկրամասից, Կուրսկից, Բրյանսկից, Պրիմորսկ-Ախտարսկից, ինչպես նաև Ղրիմից, ասվում է հայտարարության մեջ:
Ռուսական հարձակման թիրախներից մեկը եղել է Կիևի մարզի Բուչա քաղաքի քաղաքացիական ենթակառուցվածքը, վնասվել են մասնավոր տներ, մանկապարտեզ, անավարտ շինություններ, Facebook-ում հայտնել է Բուչայի քաղաքապետ Անատոլի Ֆեդորյուկը։ Նա նշել է՝ ՀՕՊ ուժերի արդյունավետ աշխատանքի շնորհիվ ոչնչացվել է հարձակվող անօդաչու թռչող սարքերի մեծ մասը։ Հարձակումներ են եղել նաև Օդեսայի, Սումիի մարզերի, Խարկովի վրա, ինչի հետևանքով կան ավերածություններ ու տուժածներ։
