Վրաստանի վարչապետ Իրակլի Կոբախիձեն հանդիպել է Թուրքիայի առևտրի նախարար Օմեր Բոլաթի հետ, որը Թբիլիսի է ժամանել վրաց-թուրքական գործարար համաժողովի շրջանակում:
Հանդիպմանը կարևորվել է երկու երկրի ռազմավարական գործընկերությունը և նշվել երկկողմ հարաբերությունների զարգացման դրական դինամիկան: Քննարկվել են տարածաշրջանային նշանակության համատեղ նախագծերը, ինչպես նաև ապրանքաշրջանառության աճը:
Վրաստանը և Թուրքիան վերանայում են ազատ առևտրի համաձայնագիրը, որպեսզի անցում կատարեն եվրոպական նորմերին: Համաժողովի շրջանակում համապատասխան փաստաթուղթը ստորագրել են Վրաստանի էկոնոմիկայի և կայուն զարգացման նախարար Մարիամ Կվրիվիշվիլին և Թուրքիայի առևտրի նախարար Օմեր Բոլաթը:
Փոփոխությունները տեղի են ունենում երկու երկրի առևտրատնտեսական հարաբերությունների ակտիվացման ֆոնին։ 2024 թվականին Թուրքիայի և Վրաստանի միջև ապրանքաշրջանառությունը կազմել է 3 մլրդ 400 մլն դոլար, և երկրներն ակնկալում են կարճաժամկետ հեռանկարում այն հասցնել 5 մլրդ դոլարի։
