Նախագահ Վահագն Խաչատուրյանն այցելել է Airbus օդանավաշինական ընկերություն
Իսպանիայի Թագավորություն կատարած աշխատանքային այցի շրջանակներում Հանրապետության նախագահ Վահագն Խաչատուրյանն այցելել է Airbus օդանավաշինական ընկերություն:
Այցի ընթացքում նախագահը հանդիպում է ունեցել ընկերության ղեկավար կազմի հետ:
Հանդիպման ընթացքում Airbus օդանավաշինական ընկերության մենեջեր Միգուել Պուլե Տորրեսը ներկայացրել է ընկերության գործունեության հիմնական ուղղություններն ու ոլորտները: Անդրադարձ է կատարվել խոշոր օդանավաշինական կազմակերպության և Հայաստանի համար համատեղ հետաքրքրություն ներկայացնող ոլորտներում փոխգործակցության հնարավորություններին և առկա ներուժի իրականացմանը:
Հանդիպման ավարտին նախագահը Միգուել Պուլե Տորրեսի և «Airbus» օդանավաշինական ընկերության նախագահի ռազմական հարցերով ավագ խորհրդական Գեներալ-լեյտենանտ Սեսար Սիմոնի ուղեկցությամբ շրջայց է կատարել գործարանում, ծանոթացել ընկերության ձեռքբերումներին և ամենաթարմ նախաձեռնություններին:
Հանրապետության նախագահի աշխատանքային այցն Իսպանիայի թագավորություն ավարտվել է:
