Վլադիմիր Պուտինը և Էմանուել Մակրոնը հեռախոսազրույց են ունեցել, որի ընթացքում քննարկել են Մերձավոր Արևելքի իրավիճակը՝ Իրանի և Իսրայելի հակամարտության համատեքստում, ինչպես նաև ԱՄՆ հարվածները Իրանի միջուկային օբյեկտներին։ Այդ մասին հայտնել է Կրեմլի մամուլի ծառայությունը:
Երկու նախագահները շեշտել են, որ որպես ՄԱԿ-ի Անվտանգության խորհրդի մշտական անդամներ՝ Ռուսաստանն ու Ֆրանսիան հատուկ պատասխանատվություն են կրում տարածաշրջանային խաղաղության և միջուկային զենքի չտարածման հարցում։ Կարևորվել է Իրանի՝ խաղաղ ատոմի զարգացման իրավունքը հարգելը և ԱԷՄԳ-ի հետ շարունակվող համագործակցությունը։
Պուտինն ու Մակրոնը համակարծիք են եղել, որ Իրանի միջուկային ծրագրի շուրջ ճգնաժամը և Մերձավոր Արևելքի հակասությունները պետք է լուծվեն բացառապես քաղաքական և դիվանագիտական ճանապարհով։ Նրանք պայմանավորվել են շարունակել շփումները՝ դիրքորոշումների համակարգման նպատակով։
Քննարկվել է նաև ուկրաինական հակամարտությունը։ «Ռուսաստանի նախագահը վերահաստատել է իր սկզբունքային դիրքորոշումը՝ խաղաղ կարգավորման հնարավոր ուղիների վերաբերյալ՝ շեշտելով երկարաժամկետ և համապարփակ համաձայնության անհրաժեշտությունը՝ հիմնված նոր տարածքային իրողությունների վրա»,- ասված է Կրեմլի հաղորդագրության մեջ։ Ըստ աղբյուրի՝ զրույցը եղել է բովանդակային։
Ուկրաինայի հարցում Մակրոնը վերահաստատել է Ֆրանսիայի անսասան աջակցությունն Ուկրաինայի ինքնիշխանությանը և տարածքային ամբողջականությանը։ «Նա կոչ է արել հնարավորինս շուտ հաստատել հրադադար և սկսել բանակցություններ Ուկրաինայի և Ռուսաստանի միջև՝ համապարփակ ու կայուն կարգավորման հասնելու համար։ Երկու նախագահները շարունակելու են շփումները նաև այս հարցի շուրջ»,- ասված է հաղորդագրության մեջ։
