Վերջին հարձակումների ֆոնին Թեհրանը դեռ չի որոշել՝ շարունակել արդյոք Միացյալ Նահանգների հետ միջուկային գործարքի և հակաիրանական պատժամիջոցների չեղարկման վերաբերյալ բանակցությունները՝ հայտարարել է Իրանի արտաքին գործերի նախարարը։ Աբբաս Արաղչին հորդորել է լուրջ չվերաբերվել երկխոսությունը վերսկսելու մասին հայտարարություններին։
Դիվանագետն անդրադարձել է Ատոմային էներգիայի միջազգային գործակալության հետ գործակցության հեռանկարին: Արաղչիի խոսքով՝ չի բացառվում հետագայում կառույցի հետ շփումները վերականգնելու հնարավորությունը, սակայն այժմ Թեհրանը հիմքեր չունի ընդունելու ԱԷՄԳ գլխավոր տնօրեն Ռաֆայել Գրոսիին:
Ավելի վաղ Իրանի խորհրդարանի անդամները հաստատել էին Իսլամական Հանրապետության և Ատոմային էներգիայի միջազգային գործակալության միջև աշխատանքները դադարեցնելու մասին օրինագիծը: Խորհրդարանի ներկայացուցիչ Ալիռեզա Սալիմին տեղեկացրել է, որ ըստ փաստաթղթի՝ գործակալության աշխատակիցներին թույլ չի տրվի մուտք գործել Իրան՝ ստուգումներ անցկացնելու համար, եթե Իսլամական Հանրապետության միջուկային օբյեկտների անվտանգությունը չապահովվի և չերաշխավորվի միջուկային խաղաղ գործունեություն ծավալելու՝ Իրանի իրավունքը:
