2025 թ. հունիսի 16-ին Հայաստանի Հանրապետության դեսպան Ծովինար Համբարձումյանը պաշտոնական հանդիպում է ունեցել Բուլղարիայի Էկոնոմիկայի և արդյունաբերության նախարար Պետար Դիլովի հետ։ Հանդիպմանը ներկա է եղել նաև էկոնոմիկայի և արդյունաբերության փոխնախարար Դոնչո Բարբալովը։ Այդ մասին հայտնում են Բուլղարիայում Հայաստանի դեսպանությունից:
Հանդիպման ընթացքում կողմերը քննարկել են տնտեսական գործընկերության խորացման, առևտրային հարաբերությունների ակտիվացման և երկկողմ առևտրի ընդլայնման հնարավորությունները։
Նախարար Դիլովը ընդգծել է, որ Հայաստանը Բուլղարիայի կարևոր արտաքին տնտեսական գործընկերներից է։ «Տարիների ընթացքում առևտրային հարաբերությունների ակտիվացման կայուն միտում է նկատվել, սակայն այս պահին առևտրաշրջանառությունը և ներդրումները չեն համապատասխանում զարգացման առկա ներուժին»,- նշել է նա։
Կողմերը համակարծիք էին, որ երկկողմ համագործակցությունը կարող է ընդլայնվել մի շարք հեռանկարային ոլորտներում, այդ թվում՝ տրանսպորտի և կապի, տեղեկատվական տեխնոլոգիաների, զբոսաշրջության և փոխադարձ հետաքրքրություն ներկայացնող այլ ոլորտներում։
Հանդիպման ժամանակ կողմերը գոհունակությամբ արձանագրեցին, որ 2025 թվականի առաջին չորս ամիսների ընթացքում արդեն իսկ գրանցվել է երկկողմ առևտրաշրջանառության 2% աճ։
Դեսպան Համբարձումյանը շեշտեց երկու ժողովուրդների միջև պատմական և մշակութային մոտիկության կարևորությունը՝ որպես գործընկերության ընդլայնման հիմք։
Դեսպան Համբարձումյանը և նախարար Դիլովը քննարկեցին նաև Հայ-բուլղարական առևտրի պալատի գործունեության ակտիվացման, ինչպես նաև երկկողմ բիզնես ֆորումների անցկացման հնարավորությունները, որոնք կնպաստեն տնտեսական համագործակցության ամրապնդմանը։
