ԱԷՄԳ-ն հաստատել է Իրանի խոշորագույն միջուկային օբյեկտի վրա հարձակումը
Ատոմային էներգիայի միջազգային գործակալության գլխավոր տնօրեն Ռաֆայել Գրոսին հայտարարել է, որ կազմակերպությունն ուշադիր հետևում է Իրանում իրավիճակին և ճառագայթման մակարդակի հարցով կապի մեջ է երկրի իշխանությունների հետ։ Գրոսիի այս հայտարարությունը հրապարակվել է կազմակերպության X-ի միկրոբլոգում։
«Ատոմային էներգիայի միջազգային գործակալությունը հետևում է Իրանում ստեղծված՝ խոր մտահոգություն առաջացնող իրավիճակին։ Գործակալությունը կարող է հաստատել, որ հարձակման թիրախում է եղել Նաթանզի միջուկային օբյեկտը։ ԱԷՄԳ-ն ճառագայթման ընթացիկ մակարդակի հարցով կապի մեջ է Իրանի իշխանությունների հետ։ Մենք նաև կապ ենք պահպանում երկրում մեր տեսուչների հետ»,- նշված է հաղորդագրության մեջ։
