Ամերիկացի միլիարդատեր Իլոն Մասկը քննադատել է ԱՄՆ նախագահ Դոնալդ Թրամփի բյուջեի օրինագիծը՝ ասելով, որ այն զրոյացնում է ծախսերը կրճատելուն ուղղված Կառավարության արդյունավետության դեպարտամենտի (DOGE) ջանքերը։
CBS-ին տված հարցազրույցում Մասկն ասել է, որ հիասթափված է օրինագծի «մեծ ծախսերից, որոնք մեծացնում են ԱՄՆ բյուջեի պակասուրդը և խաթարում DOGE թիմի կատարած աշխատանքը»։
ԱՄՆ Ներկայացուցիչների պալատը անցյալ շաբաթ 215 կողմ, 214 դեմ ձայների հարաբերակցությամբ հավանություն է տվել Թրամփի առաջարկած բյուջեի նախագծին, որը ներառում է հարկերի կրճատում և ծախսերի ավելացում, այդ թվում՝ պաշտպանության ոլորտում։ Այժմ այն քննարկվում է Սենատում։
Թրամփը օրինագիծը անվանում է «մեծ ու հրաշալի» և «հավանաբար ամենանշանակալին» ԱՄՆ պատմության մեջ։ Միևնույն ժամանակ, նա ստիպված է եղել համոզել Կոնգրեսի մի քանի հանրապետականի աջակցելու բյուջեին, գրում է Financial Times-ը։
Փորձագետները քննադատել են նախագահի նախաձեռնությունը՝ պնդելով ԱՄՆ բյուջեի պակասուրդը կրճատելու անհրաժեշտությունը, և Մասկը պաշտպանում է այդ տեսակետը։
Կոնգրեսի բյուջետային վարչության գնահատականների համաձայն՝ եթե օրինագիծն ընդունվի, երկրի բյուջեի պակասուրդը 10 տարվա ընթացքում կաճի 3,3 տրիլիոն դոլարով։
