Վաշինգտոնը Իրանին առաջարկ է ներկայացրել միջուկային գործարքի վերաբերյալ՝ հայտարարել է Դոնալդ Թրամփը:
«Նրանք գիտեն, որ պետք է արագ գործեն, այլապես շատ վատ բան տեղի կունենա»,- հավելել է ԱՄՆ նախագահը:
Սպիտակ տան ղեկավարը համոզմունք է հայտնել, որ Թեհրանը ցանկանում է գործարք կնքել:
«Ես չեմ ուզում, որ բռնություն կիրառվի, բայց նրանք միջուկային զենք չեն ունենալու»,- շեշտել է Թրամփը:
Իրանը չի հրաժարվի ուրանի հարստացման իրավունքից՝ նման հայտարարությամբ էլ հանդես է եկել Իսլամական Հանրապետության արտգործնախարարը: Աբբաս Արաղչին շեշտել է՝ իր երկիրը վճռական է՝ զարգացնելու գիտելիքները և տեխնոլոգիաները միջուկային էներգիայի խաղաղ և անվտանգ օգտագործման ոլորտում։
«Այս հարցում զիջումներ չեն լինելու»,- ընդգծել է իրանցի դիվանագետը: Միևնույն ժամանակ, իրանական կողմը վստահեցրել է՝ պատրաստ են առկա խնդիրները լուծել դիվանագիտության և երկխոսության միջոցով:
