Առողջապահության հարցերի մշտական հանձնաժողովի նախագահ Արսեն Թորոսյանը ֆեյսբուքյան գրառմամբ անդրադարձել է «London Times» անունով կայքի հրապարակմանը՝ նշելով․
«Հիբրիդային հարձակումները «պոզով-պոչով» չեն լինում: Մի քանի օր առաջ էինք խոսել, որ հիբրիդային հարձակումները ԱԺ ընտրություններին ընդառաջ գնալով շատանալու են, և ահա եկավ հերթականը մի անհայտ ռուսական ֆոնդից, որն իբր պայքարում է բռնաճնշումների դեմ:
Առնվազն ինձ համար ակնհայտ է, որ նման հրապարակումները առանց պետական աջակցության և միջամտության հնարավոր չեն և լավ տեղավորվում են «ամերիկյան բիոլաբորատորիաների» տեղեկատվական սոուսի տակ և տարածվում են նույն խավարասեր կամ խավարամիտ շրջանակների կողմից մեր երկրում` նպաստելով այդ հիբրիդային հարձակումներին:
Հ.Գ. բովանդակությանը այնքան անլուրջ է, որ չեմ էլ ուզում անդրադառնալ»:
Ավելի վաղ ՀՀ առողջապահության նախարար Անահիտ Ավանեսյանն է անդրադարձել հրապարակմանը՝ նշելով, որ ակնհայտ սուտ պնդում է արվել «Հայաստանում իրականացվող կլինիկական փորձարկումների» մասին:
Վարչապետի մամուլի քարտուղար Նազելի Բաղդասարյանն էլ նշել էր․ «Ո՛չ վարչապետի, ո՛չ հրապարակման մեջ նշված բարձրաստիճան պաշտոնյաների շրջապատում դեղագործական բիզնեսով զբաղվող անձինք չկան»։
