Խորհրդարանում այսօր լրագրողները հարց ուղղեցին ԱԺ նախագահ Ալեն Սիմոնյանին՝ հետաքրքրվելով՝ ինչու Հայաստանը զորախումբ չի ուղարկում Մոսկվայում կայանալիք Հաղթանակի շքերթին մասնակցելու:
Սիմոնյանը պատասխանեց՝ տեղյակ չէ, հարցը իր տիրույթում չէ:
«Կարծում եմ՝ վարչապետի մասնակցությունը պայմանավորված է միայն և միայն հարգանքի տուրքով: Մենք վետերաններ ունենք, մենք չենք կարող նրանց արածը ուրանալ, մեր պատգամավորներից էլ են գնացել՝ մասնակցելու շքերթին»,- պատասխանեց Սիմոնյանը:
Հիշեցնենք՝ Հայաստանի վարչապետ Նիկոլ Փաշինյանը մարտի 14-ին ՌԴ նախագահ Վլադիմիր Պուտինի հետ կայացած հեռախոսազրույցի ընթացքում հաստատել էր, որ ընդունում է Ռուսաստանի նախագահի հրավերը և մասնակցելու է մայիսի 9-ին Մոսկվայում կայանալիք տոնակատարություններին։
