Բաքվում և Ապշերոնյան թերակղզում շարունակվում են ուժեղ հյուսիսարևմտյան քամիներն ու տեղատարափ անձրևները։ Կասպից ծովում ալիքների բարձրությունը հասել է 3 մետրի։
Բնական տարերքն Ադրբեջանի մայրաքաղաքում առաջացրել է մի շարք խնդիրներ։ Որոշ փողոցներում և պողոտաներում արձանագրվել են էլեկտրամատակարարման, ինչպես նաև լուսացույցների աշխատանքի խափանումներ:
Արտակարգ իրավիճակների նախարարության մամուլի ծառայությունը հաղորդել է, որ երեկվանից իրականացվում են անձրևի հետևանքների վերացման գործողություններ: Այդ միջոցառումների շրջանակում ջրածածկ տարածքներից տարհանվել է 20 քաղաքացի, այդ թվում՝ 3 երեխա, շարունակվում է ջրի արտամղման, քաղաքացիների տարհանման և անվտանգության միջոցառումների ապահովման աշխատանքը:
Անձրևաջրերի կուտակման պատճառով երթևեկությունը սահմանափակված է քաղաքի մի շարք հատվածներում:
