ՀՀ ԱԺ Հայաստան-Ֆինլանդիա, Նորվեգիա բարեկամական խմբի անդամներ, ԱԺ «Քաղաքացիական պայմանագիր» և «Հայաստան» խմբակցության պատգամավորներ Տիգրան Պարսիլյանն ու Արփինե Վարդանյանը մարտի 17-ին հանդիպել են ՀՀ-ում Ֆինլանդիայի արտակարգ և լիազոր դեսպան Կիրստի Նարինենի հետ: Այդ մասին հայտնում են ԱԺ-ից:
Տիգրան Պարսիլյանը կարևորել է Հայաստան-Ֆինլանդիա հարաբերությունների զարգացումը՝ ընդգծելով միջխորհրդարանական փոխգործակցության ընդլայնման անհրաժեշտությունը: Դեսպան Կիրստի Նարինենը նույնպես կարևորել է միջխորհրդարանական հարաբերությունների զարգացումը:
Հանդիպմանն անդրադարձ է կատարվել տարածաշրջանային զարգացումներին, խաղաղություն հաստատելու հարցին: «Մենք պետք է անենք ամեն ինչ, որպեսզի ամբողջ տարածաշրջանում երկարատև խաղաղություն հաստատվի»,- ասել է Տիգրան Պարսիլյանը:
Արփինե Վարդանյանը խոսել է Լեռնային Ղարաբաղից բռնի տեղահանված 120.000 մեր հայրենակիցների սոցիալական խնդիրների մասին:
Տիգրան Պարսիլյանը հյուրին տեղեկացրել է, որ ՀՀ աշխատանքի և սոցիալական հարցերի նախարարությունն իրականացնում է մի շարք ծրագրեր, որոնց առանցքում ֆիննական փորձն է:
Կողմերը համագործակցության պատրաստակամություն են հայտնել:
