Սիրիայի իշխանությունները պարտավոր են պատասխանատվության ենթարկել նրանց, ովքեր հարձակվում են երկրի փոքրամասնությունների վրա: Այդ մասին ասված է ԱՄՆ պետքարտուղար Մարկո Ռուբիոյի հայտարարության մեջ։
«Միացյալ Նահանգները դատապարտում է արմատական իսլամիստ ահաբեկիչներին, այդ թվում՝ օտարերկրյա ջիհադիստներին, որոնք վերջին օրերին մարդկանց սպանում են Արևմտյան Սիրիայում»,- ասել է ամերիկյան դիվանագիտության ղեկավարը։
Նրա խոսքով՝ Վաշինգտոնը «Սիրիայի կրոնական և էթնիկ փոքրամասնությունների, այդ թվում՝ քրիստոնյա, դրուզական, ալևիական ու քրդական համայնքների կողքին է»։ «Սիրիայի ժամանակավոր իշխանությունները պետք է պատասխանատվության ենթարկեն նրանց, ովքեր իրականացրել են սիրիական փոքրամասնությունների զանգվածային սպանությունները»,- ասել է պետքարտուղարը։
Reuters-ի տվյալով՝ Սիրիայի արևմտյան հատվածում տեղի ունեցեծ երկօրյա բախումների հետևանքով սպանվել է հազարից ավելի մարդ, որից 745-ը՝ խաղաղ բնակիչ, 125-ը՝ սիրիական անվտանգության ուժերի անդամ, 148-ը՝ Ասադին հավատարիմ մարտիկ։
