Կրեմլի խոսնակ Դմիտրի Պեսկովը հայտարարել է, որ Մոսկվան ողջունում է Դոնալդ Թրամփի հայտարարությունները Ուկրաինայում խաղաղություն հաստատելու ցանկության մասին: «Ուկրաինային ամերիկյան ռազմական աջակցության դադարեցումը կարող է ստիպել Կիևին վերադառնալ ռուս-ուկրաինական խաղաղ կարգավորմանը, քանի որ Ուկրաինան ԱՄՆ-ից է ստանում զենքի և հետախուզական տվյալների ամենամեծ բաժինը»,- ասել է Պեսկովը:
Արձագանքելով Ալեքսանդր Լուկաշենկոյի առաջարկին, որ Ռուսաստանի, ԱՄՆ-ի և Ուկրաինայի նախագահների մասնակցությամբ ռուս-ուկրաինական բանակցությունները կարող են անցկացվել Մինսկում՝ ՌԴ նախագահի խոսնակը նշել է՝ նման հարց օրակարգում չկա, սակայն դա Մոսկվայի համար լավագույն տարբերակը կլիներ:
«Բելառուսը մեր գլխավոր դաշնակիցն է, հետևաբար Մինսկը բանակցությունների անցկացման լավագույն վայրն է»,- ասել է Կրեմլի խոսնակ Պեսկովը։
Նա նաև հավելել է, որ Մոսկվան պատրաստ է գործակցելու ամերիկյան ընկերությունների հետ՝ հազվագյուտ մետաղների արդյունահանման ոլորտում, սակայն դա հնարավոր է միայն ԱՄՆ պատժամիջոցների չեղարկման դեպքում։
«Մենք շահագրգռված ենք համագործակցությամբ։ Դրա համար հսկայական հնարավորություններ կան տարբեր ոլորտներում՝ տարբեր շրջաններում, Ռուսաստանի հսկայական տարածքներում, այդ թվում՝ նոր շրջաններում»,- հայտարարել է Պեսկովը։
