Լիբանանում, որտեղ իսրայելական բանակը գործողություններ է իրականացնում «Հըզբոլլահ» խմբավորման դեմ, գիշերն ուժի մեջ է մտել հրադադարը, որը նախօրեին հաստատել էր Իսրայելի կառավարությունը, գրում է Reuters։
Համաձայն զինադադարի պայմանների՝ 60 օրվա ընթացքում իսրայելական զորքերը պետք է դուրս գան Լիբանանից, իսկ «Հըզբոլլահի» զինյալները լքեն սահմանային շրջանները, որտեղ կտեղակայվի լիբանանյան բանակը։ Լիբանանի ղեկավարությունը մտադիր է Իսրայելի հետ երկրի սահմանում զինվորականների թիվը հասցնել 10 հազարի։
ԱՄՆ նախագահ Ջո Բայդենն իր ուղերձում շնորհակալություն է հայտնել Ֆրանսիայի նախագահ Էմանուել Մակրոնին՝ հրադադարի համաձայնության գործում համագործակցության համար։ Միացյալ Նահանգները և Ֆրանսիան, նշել է Բայդենը, կաշխատեն միասին՝ ապահովելու գործարքի հաջողությունը։ ԱՄՆ նախագահը նաև հույս է հայտնել, որ հրադադարը Լիբանանում կհանգեցնի խաղաղության հաստատմանը ամբողջ Մերձավոր Արևելքում և թույլ կտա դադարեցնել պատերազմը Գազայի հատվածում, որտեղ իսրայելցի զինվորականները կռվում են ՀԱՄԱՍ խմբավորման դեմ։
