Բարձր դատարանի և Նիդերլանդների դեսպանության միջև ձևավորվել են, հիրավի, օրինակելի գործընկերային հարաբերություններ. ՍԴ նախագահ
2024 թվականի հոկտեմբերի 15-ին ՀՀ Սահմանադրական դատարանի նախագահ Արման Դիլանյանն ընդունել է Հայաստանի Հանրապետությունում Նիդերլանդների Թագավորության արտակարգ և լիազոր դեսպան Մարիեկ Մոնրոյ-Վինթերին։ Այդ մասին հայտնում են ՍԴ-ից:
Սահմանադրական դատարանի նախագահը շնորհավորել է նորանշանակ դեսպանին Հայաստանի Հանրապետությունում դիվանագիտական առաքելության մեկնարկի կապակցությամբ։ Արման Դիլանյանը բարձր է գնահատել Նիդերլանդների Թագավորության դեսպանատան հետ համագործակցությունը՝ ընդգծելով, որ Բարձր դատարանի և Դեսպանության միջև ձևավորվել են, հիրավի, օրինակելի գործընկերային հարաբերություններ։
Սահմանադրական դատարանի նախագահը կարևորել է Նիդերլանդների դեսպանության հետ արդեն մի քանի տարի իրականացվող համատեղ ծրագրերը, որոնք ուղղված են Սահմանադրական դատարանում ընթացող ինստիտուցիոնալ բարեփոխումների խթանմանը, ներքին ընթացակարգերի բարելավմանն ու հանրային հաշվետվողականության բարձրացմանը։
Դեսպան Մարիեկ Մոնրոյ-Վինթերը շնորհակալություն է հայտնել ջերմ ընդունելության համար, վերահաստատելով դեսպանության հանձնառությունը՝ աջակցել Հայաստանի իրավական ինստիտուտներին՝ ժողովրդավարական գործընթացների իրականացման գործում։ Տիկին Մոնրոյ-Վինթերն, իր հերթին պատրաստակամություն է հայտնել ջարքեր ներդնել՝ Բարձր դատարանի հետ արդեն իսկ ամուր հիմքերի վրա դրված համագործակցության շարունակականության ապահովման և զարգացման ուղղությամբ։
Հանդիպման ընթացքում պայմանավորվածություն է ձերք բերվել շարունակելու համագործակցությունը երկկողմ աշխատանքային խմբերի ձևաչափով։
.jpg)
