Անկարայում տեղի է ունեցել Թուրքիայի և Ադրբեջանի արտգործնախարարներ Հաքան Ֆիդանի և Ջեյհուն Բայրամովի հանդիպումը: Բանակցությունների ընթացքում քննարկվել են երկկողմ համագործակցության հարցեր, ինչպես նաև միջազգային և տարածաշրջանային թեմաներ, Ադրբեջանի և Թուրքիայի հարաբերությունները Հայաստանի հետ:
Բայրամովը նշել է, որ Ադրբեջանը և Թուրքիան շարունակելու են համատեղ քայլեր ձեռնարկել տարածաշրջանում խաղաղության հաստատման համար։ Հանդիպման ավարտին լրագրողների հետ կայացած ասուլիսում Բայրամովը կրկին դժգոհել է Հայաստանի կողմից զինամթերք ձեռք բերելու գործընթացից՝ պնդելով, թե Երևանին դեպի այդ քայլը դրդում են երրորդ երկրները:
Միաժամանակ, նա նշել է, թե Ադրբեջանը կարծում է, որ տարածաշրջանում առկա է պատմական հնարավորություն՝ հաստատելու կայուն խաղաղություն, և բանակցություններում դրական դինամիկա է նկատվում։
Այդուամենայնիվ, Բայրամովը հերթական անգամ հայտարարել է, թե Հայաստանը տարածքային պահանջներ ունի Արդբեջանի և Թուրքիայի նկատմամբ:
