ՀՀ ԱԺ նախագահ Ալեն Սիմոնյանը հունիսի 7-ին ընդունել է Հայաստանում ՄԱԿ-ի նորանշանակ մշտական համակարգող Ֆղանսուազ Ժակոբին: Այս մասին տեղեկացնում են ԱԺ մամուլի ծառայությունից։
Խորհրդարանի ղեկավարը շնորհավորել է Ֆղանսուազ Ժակոբին պաշտոնի ստանձնման կապակցությամբ և մաղթել արդյունավետ աշխատանք:
«Մեծապես կարևորում եմ ՄԱԿ-ի տարբեր գործակալությունների և կառույցների միջոցով մեր երկրի ինստիտուցիոնալ բարեփոխումների օրակարգին ցուցաբերվող հետևողական աջակցությունը:
Մենք՝ օրենսդիրներս, անում ենք և պատրաստ ենք անել հնարավորը՝ օրենսդրական դաշտի ապահովման և ռազմավարական տարբեր ծրագրերի իրականացման համար»,- նշել է Ալեն Սիմոնյանը:
Կազմակերպության հետ գործընկերության առաջնահերթություններից ԱԺ նախագահը կարևորել է աջակցությունը Հարավային Կովկասում խաղաղության հաստատման, Հայաստան-Ադրբեջան բանակցությունների գործընթացի և Ադրբեջանում ապօրինի պահվող հայ ռազմագերիների վերադարձի հարցերը:
Քննարկվել են համատեղ իրականացվող նախաձեռնությունները և ծրագրերը, մասնավորապես՝ ՄԱԿ-ի Կայուն զարգացման ծրագրի շրջանակում կրթական, հումանիտար, էներգետիկ և այլ ոլորտներում համագործակցությունը:
