ԱՄՆ նախագահ Ջո Բայդենի հրամանագիրը Ռուսաստանի դեմ երկրորդական պատժամիջոցների մասին հանգեցրել է բացասական հետևանքների Ռուսաստանի և Թուրքիայի միջև առևտրի վրա, հայտնում է Reuters-ը՝ հղում անելով աղբյուրներին։ Նշվում է, որ փաստաթուղթն ուղղակիորեն չի վերաբերում էներգետիկային, սակայն դանդաղեցրել է ռուսական նավթի համար որոշ վճարումների փոխանցումը և հարվածել է թուրքական արտահանմանը։
«Ռուսաստանի հետ բիզնես ունեցող ֆինանսական ընկերությունների նկատմամբ պատժամիջոցներ կիրառելու ԱՄՆ քայլերը սառեցրել են թուրք-ռուսական առևտուրը։ Խախտվել կամ դանդաղեցվել են որոշ վճարումներ ինչպես ներմուծվող նավթի, այնպես էլ թուրքական արտահանման համար»,- ասվում է նյութում։
Թուրքական բանկային հատվածի աղբյուրը ավելի վաղ РИА Новости-ին հայտնել էր, որ Մոսկվան և Անկարան քննարկում են թուրք-ռուսական բանկի ստեղծման հարցը՝ լուծելու ԱՄՆ պատժամիջոցների պատճառով դրամական փոխանցումների հետ կապված խնդիրները։ Սակայն էապես ոչինչ դեռ որոշված չէ։
Bloomberg լրատվական գործակալությունն ավելի վաղ հայտնել էր չինական բանկերի կողմից Ռուսաստանի դեմ սահմանափակումներ մտցնելու մասին։ Աղբյուրի տվյալով՝ պատժամիջոցները սահմանել են չինական պետական բանկերը՝ ԱՄՆ-ի սպառնալիքների պատճառով։
