Ուրբաթ՝ փետրվարի 16-ին, Բավարիայի մայրաքաղաք Մյունխենում աշխատանքն է սկսել անվտանգության 60-րդ միջազգային համաժողովը՝ անվտանգության հարցերով աշխարհի ամենահեղինակավոր ֆորումը։ Միջոցառմանը մասնակցում են կառավարության 180 բարձրաստիճան ներկայացուցիչներ, այդ թվում՝ պետությունների և կառավարությունների ղեկավարներ գրեթե 50 երկրից:
Համաժողովին մասնակցում է նաև Հայաստանի վարչապետ Նիկոլ Փաշինյանը: Մյունխեն է ժամանել Ադրբեջանի նախագահ Իլհամ Ալիևը:
Համաժողովի հիմնական թեմաներն են լինելու Ուկրաինայում և Մերձավոր Արևելքում, ինչպես նաև Սոմալիում, Սուդանում և Հայիթիում տեղի ունեցող պատերազմները։ Մյուս կարևոր թեմաները կլինեն միջազգային իրավունքի գերակայությունը՝ որպես համակեցության հիմք, ՄԱԿ-ի Անվտանգության խորհրդի հնարավոր բարեփոխումը և կլիմայի փոփոխությունները։
