Հայտնի են Հայաստանի բասկետբոլի հավաքականների մրցակիցները Եվրոպայի 2024 թ. առաջնություններում: Վիճակահանությունը տեղի է ունեցել Գերմանիայի Ֆրայզինգ քաղաքում:
ԿԳՄՍՆ-ից տեղեկացնում են, որ տղամարդկանց Մ16 տարեկանների հավաքականն ընդգրկվել է С դիվիզիոնի B ենթախմբում, որտեղ կմրցի Կոսովոյի, Ջիբրալթարի, Սան Մարինոյի հավաքականների հետ: Հանդիպումները տեղի կունենան 2024 թվականի հուլիսի 9-ից 14-ը Ալբանիայի Դուրես քաղաքում:
Մ18 տարեկանների հավաքականը հայտնվել է С դիվիզիոնի B ենթախմբում, որտեղ կմրցի Մոլդովայի, Մոնակոյի, Ադրբեջանի հավաքականների հետ: Հանդիպումները կլինեն 2024 թվականի հուլիսի 23-28-ը Ալբանիայի Էլբասան քաղաքում:
Մ20 տարեկանների հավաքականը ընդգրկվել է B դիվիզիոնի C ենթախմբում, որտեղ կմրցի Շվեդիայի, Հունգարիայի, Ուկրաինայի, Կոսովոյի և Մոլդովայի հավաքականների հետ: Հանդիպումները տեղի կունենան 2024 թվականի հուլիսի 12-21-ը Ռումինիայի Պիտեշտ քաղաքում:
Կանանց Մ16 տարեկանների հավաքականը հայտնվել է С դիվիզիոնի A ենթախմբում, որտեղ կմրցի Վրաստանի, Ադրբեջանի և Կիպրոսի հավաքականների հետ: Հանդիպումները կլինեն 2024 թվականի հուլիսի 9-14-ը Ջիբրալթարում:
Կանանց Մ18 տարեկանների հավաքականն էլ ընդգրկվել է C դիվիզիոնի B ենթախմբում, որտեղ կմրցի Ալբանիայի, Վրաստանի և Ադրբեջանի թիմերի հետ: Հանդիպումները տեղի կունենան հուլիսի 23-28-ը Կոսովոյի Պրիշտինա քաղաքում:
Կանանց Հայաստանի ազգային հավաքականը Եվրոպայի փոքր երկրների առաջնությունում հայտնվել է B ենթախմբում, որտեղ կհանդիպի Նորվեգիայի, Ալբանիայի, Անդորրայի ընտրանիների հետ: Առաջնությունը կանցկացվի հունիսի 25-30-ը Կոսովոյի Պրիշտինա քաղաքում:
