Բահրեյնում ավարտված՝ Ռազմավարական հետազոտությունների միջազգային ինստիտուտի «Մանամայի քննարկումներ» ամենամյա միջոցառման ժամանակ ելույթ է ունեցել Հորդանանի արտգործնախարար Այման Սաֆադին ու անդրադարձել ինչպես Գազայի հատվածում, այնպես էլ Հորդանան գետի արևմտյան ափին տիրող իրավիճակին:
Արտգործնախարարը հարց է ուղղել, եթե Գազայի հատվածում իսրայելական ռազմական գործողությունները բացատրում են որպես պատասխան ՀԱՄԱՍ-ի հարձակումներին, ապա ինչպես բացատրել Արևմտյան ափին կատարվող գործողությունները, որոնց ժամանակ սպանվել է 200 պաղեստինցի:
Ըստ արտգործնախարարի՝ ամեն օր հրեա վերաբնակները հարձակումներ են կատարում պաղեստինցիների վրա, այդ հարձակումների թիրախում է նաև Երուսաղեմի հայ համայնքը, որը ՀԱՄԱՍ-ի հետ ոչ մի կապ չունի:
«Դարեր ի վեր հայերի ներկայությունն այդ քաղաքում սպառնալիքի տակ է, իսկ ոստիկանները հանգիստ նայում են, թե ինչպես են հրեա վերաբնակները շներով հարձակվում հայերի վրա»,- ասել է Այման Սաֆադին:
Արտգործնախարարը հարց է ուղղել ներկաներին, թե արդյուք դա՞ էլ է ՀԱՄԱՍ-ի դեմ պայքար: Նա կոչ է արել իրերն իրենց անունով կոչել և անմիջապես վերջ դնել այս պատերազմին:
